Nakigtigom ang Metro Cebu Flood Control and Drainage System Implementation Task Force sa Kapitolyo sa Sugbo kagahapon Agosto 5 aron hisgutan ang hiniusang plano batok sa pagbaha sa Metro Cebu.
Lakip sa ilang gisabotan ang pagbahin sa mga lokal nga kagamhanan (LGUs) ngadto sa mga grupo aron mas sayon ang pagplano ug pagpatuman sa mga prayoridad nga proyekto sa flood control.
Ang maong task force gitukod pinaagi sa Executive Order No. 74 nga gipirmahan ni Governor Pamela Baricuatro niadtong Nobyembre sa miaging tuig. Matod sa gobernador, gikinahanglan ang dali ug lig-on nga aksyon tungod kay nagkagrabe ang pagbaha nga nakaapekto sa kinabuhi sa mga tawo, panginabuhi, ug mga imprastraktura.
Mitambong usab sa tigom sila Vice Governor Glenn Soco, mga miyembro sa Provincial Board, mga opisyal sa Kapitolyo nga gipangulohan ni Provincial Administrator Atty. Ace Durano, ug mga representante gikan sa nagkalain-laing ahensya sa nasodnong gobyerno.
Lakip sa mga gisugyot nga proyekto ang pagpalig-on sa mga tampi sa suba, paghimo og mga drainage ug diversion channels, flow control systems, dam, retention basins, ug rainwater harvesting systems.
Gipahibalo usab nga naggahin ang nasudnong gobyerno og labing menos ₱8 bilyon alang sa pagtukod og mga dam sa dagkong suba sa Sugbo aron makatabang sa pagpahinay sa pag-awas sa tubig panahon sa kusog nga ulan.
I via Renante Socia Lada