Mokabat ngadto sa 633 ka mga depektuso ug wala na lukata nga mga timbangan ang gitakdang gub-on sa Office of the City Markets karong buwana.
Segon ni City Market Administrator Robert Barquilla, ang mga timbangan nga ilang gub-on natapok nila sugod 2022 hangtod Hulyo karong tuiga.
“Naa tay plano…with Acting Mayor (Raymond Alvin Garcia) nga magguba gyud ta sa mga timbangan, kadtong na-confiscate nato. Magguba na karong umaabot August 19. Unya kana nga mga timbangana iapil nato ang last year nga nadakpan ug ang previous year nga nadakpan,” matod ni Barquilla.
“Sa akong record sa inventory nato sa mga timbangan nga nangadakpan nato unya wa na lukata, beyond repair na, 633 ka mga timbangan ang atong himuong ceremonial nga pagguba with the acting mayor,” dugang niya.
Sa nasayran basi sa datos sa Office of the City Markets, 297 ka mga timbangan ang ilang nasakmit niadtong 2022; 230 ka buok niadtong 2023; ug 104 sa Enero hangtud sa Hulyo karong tuiga.
Si Barquilla nagpahinomdum ug nagpahimangno ngadto sa mga manindahay nga magtinarong ug dili gyud magbinoang sa ilang pagpaninda.
“Subsob na man ang atong pagdakop anang mga timbangan nga kaning naay defective, naa poy siguro gitikasan ilang adjust-son. Ang ako lang sigurong pahimangno nga palihog di lang gyud ta magbinoang sa kamerkadohan. Kung magtinarong ta, kadtong gyud sakto nga timbangan, calibrated unya with sticker gani siya from sa atong opisina,” ingon niya.
Gipadayag sab ni Barquilla nga kung makita nila nga magsige na ang paglapas sa manindahay kabahin sa saktong timbangan, mahimo nga temporary nga dili na sila tugotan sa pagpaninda.
“Makita gani nato nga magsige na ang violation, pwede man na…i-suspend nato na ang ilang pagpaninda kay binoang na man na. Ang atoa diri is kung maayo man gud ang timbangan, sakto ang presyo, ang proteksyon man gud ana adto sa mga konsumidor, atong mga buying public ba,” sulti niya. (Renante Socia Lada)
(Source: Cebu City PIO)