Mikabat kapin sa 360 ka mga indibidwal ang nadakpan sa tibuok Central Visayas atol sa tulo ka adlaw nga Simultaneous Anti-Criminality Law Enforcement Operations (SACLEO) nga gihimo sa Police Regional Office 7 (PRO7) gikan Mayo 26 hangtod Mayo 28, 2025.
Usa sa mga dakong kalampusan sa operasyon mao ang pagkasakmit sa 2,265.93 gramos nga shabu nga gibana-banang nagkantidad og ₱15,408,324.00 sumala sa standard drug price. Kini nagpakita sa padayon ug hugot nga kampanya batok sa ilegal nga drogas sa rehiyon.
Ang gipakusgan nga anti-drug operations misangpot sa 185 ka malampusong operasyon ug 215 ka drug personalities ang nadakpan.
Gawas sa drug operations, 33 usab ka operasyon batok sa ilegal nga sugal ang gihimo diin 38 ka mga tawo ang nadakpan. Nasakmit usab ang 66 ka gambling paraphernalia ug ₱7,905.00 nga kuwarta.
Sa paningkamot nga mapugngan ang pagdaghan sa ilegal nga armas naghimo ang PRO-7 og 65 ka operasyon nga misangpot sa pagdakop sa 15 ka tawo, pagkumpiskar ug boluntaryong pagsurender sa 63 ka armas ug tulo ka eskplosibo. Ang maong kampanya gitumong aron mapapas ang mga pribadong armadong grupo ug malikayan ang bayolenteng krimen nga may kalabutan sa armas.
Samtang, ang rehiyon-wide nga pagpangdakop sa mga wanted persons miresulta usab sa pagkasikop sa 95 ka indibidwal, 14 niini giila nga most wanted. Ang uban nga 81 adunay outstanding warrant of arrest tungod sa nagkadaiyang krimen.
Gipadayag sa PRO7 Regional Director PBGEN Redrico A. Maranan ang iyang pasidungog sa tanang personnel nga misalmot sa SACLEO nga miresulta sa dako nga kalampusan.
Source: PRO-7
I via Renante Socia Lada