Giadto sa mga operatiba sa PDEA-7 ug Mambaling Police Station ang usa ka drug den nga nahimutang sa C. Padilla, Barangay Duljo Fatima, dakbayan sa Sugbo, alas 2:50 sa hapon, Enero 15, 2025, nga miresulta sa pagka-aresto sa tulo ka tawo, lakip ang usa ka kanhi pulis.
Ang nadakpan mao si alyas “Ruel,” 58-anyos, kanhi Police Staff Sergeant nga nakaserve sa PNP sulod sa 18 ka tuig. Si Ruel nag-AWOL sukad niadtong 2004, human matod pa siya nawad-an og gana motrabaho tungod sa problema sa pamilya. Siya giingong nagpadagan og drug den sa maong lugar.
Lakip sa mga nasikop mao sila alyas “Cosme,” 61-anyos, usa ka “on-call driver” nga taga-Samboan, ug alyas “Seighbrey,” 46-anyos, usa ka parking boy nga taga-Barangay Santo Niño, dakbayan sa Sugbo.
Gikumpiska sa operasyon ang pito ka pakete nga adunay sulod nga gituohang shabu nga mokabat og gibug-aton nga 18 gramos nga nagkantidad og P122,400. Dugang pa, nakuha usab ang buy-bust money, cellphone, ug mga drug paraphernalia. Ang mga ebidensya gipasa sa PDEA-7 Regional Office Laboratory alang sa chemical analysis.
Sumala ni Leia Alcantara, information officer sa PDEA-7, si Ruel na-priso na niadtong 2016 tungod sa ilegal nga drogas apan na-acquit pag-2022. Human makagawas, siya mibalik sa iyang naandan nga kalihokan ug giingong makabaligya og 10 ngadto sa 50 gramos nga shabu matag semana.
Ang maong operasyon nahimong resulta sa usa ka semana nga case buildup human makadawat og impormasyon gikan sa usa ka concerned citizen. Ang mga awtoridad nagpadayon sa kampanya aron masugpo ang mga drug den ug matabangan ang komunidad batok sa epekto sa ginading drogas sa nasud.
📸PDEA-7
I via Renante Socia Lada