Gitukod na ang Monkeypox Task Force sa probinsya sa Bohol pinaagi sa Executive Order No. 28, isip kabahin sa pagpangandam ug pakigbatok sa hulga sa Monkeypox virus.
Niadtong Mayo 29, 2025, nagpatawag og emergency meeting si Gob. Erico Aris Aumentado uban sa mga key offices ug ahensiya nga adunay kalabutan sa kahimsog ug kaluwasan sa publiko, subay sa balita nga kaso sa Monkeypox sa ubang lugar.
Gitataw ni Gobernador Aumentado nga wala pay narehistrong kaso sa Monkeypox sa probinsya, apan higpit nga gi-monitor sa Provincial Health Office (PHO) ang kahimtang aron malikayan ang pagsulod ug pagkaylap sa virus.
Gipahimangnoan usab ang publiko nga magpabiling alerto ug likayan ang dili kinahanglan nga pagtapok-tapok, labi na sa mga lugar nga daghang tawo, aron malikayan ang posibleng pagkatap.
Ang mga LGU, barangay officials, ug health workers gi-awgag nga magtukod og mga localized awareness campaigns aron mas mapalig-on ang kasayuran ug kooperasyon sa komunidad.
Ang Executive Order No. 28 naglatid sa mga lakang sa pagpahugot sa surveillance, reporting, ug coordination efforts tali sa mga health authorities ug lokal nga panggamhanan.
Source: Bohol Provincial Government
I via Renante Socia Lada