Nasikop sa kapulisan ang usa ka High-Value Individual (HVI) ug iyang kauban atol sa usa ka malampusong buy-bust operation nga gihimo sa Municipal Drug Enforcement Unit (MDEU) sa Badian Municipal Police Station kagahapon Hunyo 6, 2026 sa Barangay Malabago, Badian, Cebu.
Sa operasyon nga gihimo uban sa koordinasyon sa Philippine Drug Enforcement Agency (PDEA), nakuha gikan sa mga suspetsado ang lima ka pakete sa gituohang shabu nga adunay kinatibuk-ang gibug-aton nga 8 gramos ug kantidad nga ₱54,400.00 sumala sa Standard Drug Price.
Gawas sa ilegal nga drogas, nakarekober usab ang mga operatiba og usa ka armas ug duha ka buhing bala. Tungod niini, dugang nga kaso ang giandam batok sa mga nadakpan tungod sa paglapas sa Republic Act 10591 o
Comprehensive Firearms and Ammunition Regulation Act.
Gidala ang duha ka suspetsado sa Badian Municipal Police Station alang sa hustong dokumentasyon ug detensyon.
Samtang, ang mga nakompiska nga drogas gipadala sa Cebu Provincial Forensic Unit sa Carcar City alang sa laboratory examination. Matod ni PCOL Abubakar Udang Mangelen Jr., Provincial Director sa Cebu Police
Provincial Office, magpadayon ang ilang kampanya batok sa ilegal nga drogas ug kriminalidad aron masiguro ang kalinaw ug kaluwasan sa mga komunidad sa tibuok probinsiya sa Cebu.
I via Renante Socia Lada