Nadakpan sa kapulisan ang usa ka High-Value Individual (HVI) sa buy-bust operation sa Barangay San Roque, Talisay City, sa gabii sa Hunyo 29, 2026.
Nadakpan ang suspetsado human kini nakabaligya og usa ka pakete sa gidudahang shabu ngadto sa usa ka pulis nga nagpakaaron-ingnon og buyer. Nakalingkawas hinuon ang usa ka babaye nga giingong kauban sa suspetsado, ug padayon pa siyang gipangita sa kapulisan.
Nakuha sa operasyon ang 12 ka pakete sa gidudahang shabu, buy-bust money, kuwarta nga gituohang gikan sa baligya sa drogas, usa ka sling bag, ug uban pang mga butang.
Sumala sa kapulisan, mokabat sa 150.15 gramos ang nakuhang gidudahang shabu nga adunay gibanabanang kantidad nga ₱1,021,020 o kapin ₱1 milyon.
Matod sa kapulisan, padayon nilang palig-onon ang kampanya batok sa ilegal nga drogas aron madakpan ang mga nagbaligya ug droga ug mapabiling luwas ang mga komunidad sa Cebu.
I via Renante Socia Lada