Nadakpan sa kapulisan ang usa ka gitawag nga High-Value Individual (HVI) ug iyang kauban atol sa buy-bust operation nga gihimo sa Cordova Municipal Police Station sa Barangay Catarman, Cordova, Cebu sa gabii sa Hunyo 23, 2026. Sa operasyon, nasakmit ang gibana-banang 70 gramos sa gituohang shabu nga adunay kantidad nga mokabat og ₱476,000.
Ang operasyon gipahigayon sa Station Drug Enforcement Unit (SDEU) sa Cordova Police Station uban sa koordinasyon sa Philippine Drug Enforcement Agency (PDEA). Nadakpan ang suspetsadong HVI human malampusong makapalit og gituohang shabu ang usa ka police poseur-buyer, nga misangpot sa daling pagdakop sa mga suspek ug pagkumpiskar sa ilegal nga drogas.
Narekober sa mga operatiba ang usa ka sachet sa gituohang shabu nga gibaligya sa poseur-buyer, 11 pa ka sachet nga nakuha gikan sa HVI, ug duha ka sachet nga nakuha gikan sa iyang kauban. Base sa imbestigasyon, ang HVI giingong nalambigit sa pag-apod-apod sa ilegal nga drogas sa Barangay
Catarman ug sa kasikbit nga mga lugar sa Cordova, samtang ang iyang kauban giingong nalambigit sa paggamit sa ilegal nga drogas.
Sa pagkakaron, anaa sa kustodiya sa Cordova Municipal Police Station ang duha ka nadakpan samtang giandam ang kasong paglapas sa Sections 5 ug 11 sa Republic Act 9165 o Comprehensive Dangerous Drugs Act of 2002.
Gidayeg usab ni CPPO Director PCOL Abubakar Udang Mangelen Jr. ang mga operatiba sa ilang malampusong operasyon ug mipasalig nga padayon nilang pakusgan ang kampanya batok sa ilegal nga drogas aron mapanalipdan ang kalinaw ug kaluwasan sa mga komunidad sa Sugbo.
I via Renante Socia Lada