Malampusong nasiguro sa Police Regional Office 7 (PRO7) ang kalinaw, kahapsay, ug kaluwasan sa Solemn Foot Procession sa Señor Santo Niño isip kabahin sa 461st Fiesta Señor Celebration sa Enero 17, 2026. Sumala sa PRO7, walay bisan unsang insidente sa krimen nga natala atol sa tibuok relihiyosong kalihokan.
Kapin sa 1.9 milyones ka mga deboto ang mitambong ug misalmot sa prosisyon, nga nagsugod sa Basilica Minore del Santo Niño ug miagi sa kapin 6 ka kilometro nga rota sa nag-unang mga dalan sa Cebu City. Napuno sa pag-ampo ug dakong debosyon ang kahimtangan sa maong kalihokan.
Matod sa PRO7, nagpakita kini sa ka-epektibo sa seguridad ang malinawon ug solemne nga kahimtangan sa prosisyon. Kapin sa 2,000 ka security personnel ang gipakatap sa tibuok rota, mga key area, ug mga critical nga intersection aron masiguro ang crowd control, traffic management, ug paspas nga pagresponde kung adunay emerhensiya.
Sumala kang Police Brigadier General Redrico A. Maranan, Regional Director sa PRO7, ang walay krimen nga resulta bunga sa hapsay nga plano, hugot nga pagdumala, ug disiplina sa mga pulis. Gipasalamatan usab niya ang kooperasyon ug disiplina sa minilyon ka deboto nga mitambong.
Gipadayag ni PBGen Maranan nga magpadayon ang PRO7 sa hugot nga pagbantay samtang nagpadayon ang mga kalihokan sa 461st Fiesta Señor ug Sinulog. Sigurado, matud pa niya, nga andam ug nagbantay ang kapulisan aron mapadayon ang kalinaw, kahapsay, ug kaluwasan sa tanang motambong sa selebrasyon.
Source: PRO7 PIO
I via Renante Socia Lada