Nasikop sa kapolisan sa Bohol ang usa ka giilang high-value target sa ilawom sa usa ka buy-bust operation nga gipahigayon sa Barangay Tungod, Inabanga, Bohol, alas 11:50 niadtong najalabay na gabii. Sa operasyon, nakumpiskar ang gibanabanang 1 ka kilo sa gituhang shabu nga nagkantidad og ₱6.8 milyones.
Ang suspetsado usa ka 22-anyos nga lalaki, ulitawo, ug Grade 10 student nga walay trabaho, ug lumulupyo sa Barangay Mantatao, Calape, Bohol. Ang kapulisan mikonsiderar sa dinakpan nga aktibo sa kalihukan sa iligal nga drogas tungod sa gidaghanon sa nakuha niini.
Gipangulohan ang operasyon ni PCPT Albert R. Sator, hepe sa Inabanga Municipal Police Station, uban ang Provincial Intelligence Unit (PIU) ug Provincial Drug Enforcement Unit (PDEU) nga pinangulohan ni PLTCOL Joemar S. Pomarejos. Ang tibuok lakang nasuportahan sa opisina ni PCOL Arnel B. Banzon, Provincial Director sa Bohol Police Provincial Office, ug sa Regional Intelligence Division 7.
Matud ni PCOL Banzon, ang maong kalampusan usa ka klaro nga pahimangno sa mga nagpabilin sa iligal nga drogas nga dili na magdugay ang ilang kalihukan.
Gipadayag usab ni PLTCOL Norman Nuez, tigpamaba sa BPPO, nga magpadayon ang kapulisan sa ilang walay hunong nga kampanya batok sa iligal nga drogas. Ang insidente nagpamatuod sa determinasyon sa kapulisan nga panalipdan ang komunidad sa hulga sa iligal nga drogas.
I via Renante Socia Lada