Cebu City – Gisupak ni Cebu Governor Gwendolyn Garcia sa ikaduhang higayon ang gibanhaw ug gitinguha nga “Sugbuak”, pag biya sa Mactan Island gikan sa lalawigan sa Sugbo sa pinaagi sa katukuran sa Province of Mactan.
“I was, and I am and will always be against Sugbuak. And I know that the people of Cebu agree with me,” mensahi ni Garcia, Miyerkules, Hulyo 6.
Kini maoy tubag sa gobernador sa bag-ong giluwatan nga pamahayag ni Lapu-Lapu City Mayor Junard “Ahong” Chan, kinsa mipadayag sa iyang suporta sa posibling pag himo ug Province of Mactan.
Si Garcia kinsa maoy president sa 1Cebu nga na porma aron pagsupak sa Sugboak movement, mihulagway nga “costly” ang paghimo ug lain nga probinsya.
“Kani man gung mo-file ka’g bill nga mag-create og bag-ong probinsya, and in this case iapil ang Cordova, first of all mangutana ta sa mga mayor sa tibuok Probinsya sa Sugbo lakip na ang mayor sa Cordova kon mosugot ba siya nga maapil siya sa bag-ong probinsya,” pasabot ni Garcia.
“Mosugot ba ang ubang mga mayor sa tibuok probinsya nga makuhaan og lungsod, makuhaan og population, duna nay epekto sa atong IRA (Internal Revenue Allotment) – mao nay tawag sa una, karon NTA or National Tax Allocation,” dugang sa gobernador.
Sa media forum, Martes, Hulyo 5, gipadayag ni Chan ang iyang suporta sa paghimo ug buwag nga Province of Mactan nga maglakip unya sa lungsod sa Cordova.
Apan, gitataw ni Chan nga samtang naa ang maong tinguha, matod sa mayor nga dili kini maoy prayoridad sa iyang administrasyon. (Jhon Tadlip)
(News & photo courtesy of Cebu Provincial Government | Lapu-Lapu City PIO)