Gitakdang i-proklama sa Commission on Elections (Comelec) ang mananaug sa gubernatorial ug vice gubernatorial sa lalawigan sa Sugbo, Hwebes sa hapon, Mayo 10, 2022.
Gipaabot na lang ang unom ka mga lokalidad nga maka transmit sa election results.
Gibutyag ni Atty. Jerome Brillantes, acting Provincial Elections Supervisor sa Comelec-Cebu nga naghuwat na lang sila sa election results gikan sa mga syudad sa Danao, Bogo, Toledo ug mga lungsod sa Santa Fe, Malabuyoc ug Tabuelan.
Gipahibaw ni Brillantes nga ang maong mga lokalidad nakasinate ug logistical ug technical difficulties alang sa dali nga pag transmit sa resulta human mipalyar ang vote-counting machine.
Ang Comelec-Cebu dunay kinatibuk-ang 51 ka mga lokalidad sa probinsya sa Sugbo.
Sa pikas bahin, gikataho sa local election office nga sa pagka alas 9:30 sa buntag mi-abot na ug 84 porsento.
Matod ni Brillantes nga naglaum sila nga masunod ang ilang pasiunang gilantaw nga pag proklama sa mga mananaug Hwebes sa hapon.
Sa pagka alas 10:39 sa buntag, na maintain ni incumbent Governor Gwendolyn Garcia ang iyang labaw batok kang kanhi tourism secretary Ace Durano, basi sa partial ug  official tally sa Comelec-Cebu.
Naka kuha si Garcia ug 1,290,826 ka botos samtang ang kang Durano miabot ug 270, 610.
Sa pagka bise gobernador nag-atbang sila si incumbent Vice Governor Hilario Davide III ug Dr. Tess Heyrosa, ang running mate ni Garcia.
Nag-una si Davide sa botos nga 668,368, samtang si Heyrosa dunay 627,241 ka mga botos.
Sa kinatibuk-an, gi dominar sa One Cebu Party ang mga lain-lain posisyon sa lokal sa lalawigan sa Sugbo. (Jhon Tadlip)
(Source:Â Comelec-Cebu, photos courtesy of Cebu Provincial Government | Samboan Cebu Media Volunteer)
