Gipasiugda ni Gob. Pamela Baricuatro nga ang tinuod nga liderato kinahanglan mabati sa katawhan labi na kung adunay krisis o kalamidad.
Sa iyang pakigpulong sa Leaders’ Forum nga gihimo sa Ramon Aboitiz Foundation Inc. ug University of the Philippines National College of Public Administration and Governance, giingon sa gobernador nga importante ang pag-andam sa gobyerno, panaghiusa, ug paghatag og serbisyo nga nakasentro sa katawhan.
Ang maong kalihokan gihimo sa usa ka hotel sa Lapu-Lapu City kagahapon Abril 28.
Sumala niya, base sa iyang kasinatian sa miaging tuig diin naapektuhan ang Cebu sa sunod-sunod nga kalamidad, nasabtan niya nga ang liderato dili lang kutob sa plano ug sistema.
“Sa panahon sa kalisod, importante nga naa ang lider—maminaw, motabang dayon, ug magpakita og kalooy sa katawhan,” matod niya.
Gidugang pa niya nga ang sukdanan sa lider dili makita sa sayon nga panahon, kundili kung unsaon niya pagbarog uban sa katawhan sa lisod nga sitwasyon.
Ang forum nga may temang “Bridging Leaders, Building Hope” gitambongan sa kapin 40 ka mga lider lokal, apil na ang mga mayor sa Cebu ug uban pang partners. Gihisgutan didto ang mga hagit sa liderato, panaghiusa, ug mga global nga isyu.
Apil sa mga speakers sila Baguoo City Mayor Benjamin Magalong, Basilan Mayor Sitti Djalia Turanin-Hataman, Siargao Mayor Alfredo Coro II, Board Member Javier Benitez, ug BM Jason Gonzales.
Gilusad usab sa maong event ang Executive Course on Leadership and Governance sa UP-NCPAG, nga tumong sa pagpalambo sa abtik ug responsableng liderato sa mga public servants.
Giingon ni Baricuatro nga sa karon nga panahon, dili na pwede nga mag-inusara ang mga lider. Kinahanglan magtinabangay, magpaambit og kasinatian, ug magkat-on gikan sa usag usa aron masulbad ang mga problema sama sa kalamidad ug ekonomikanhong hagit.
Sa umaabot, mipasalig siya nga padayon nga palig-onon sa Cebu ang disaster preparedness ug response system, ug palapdan ang panag-partner aron masiguro nga walay Sugboanon nga mabiyaan sa panahon sa krisis.
Gidapit usab niya ang ubang lider nga magpadayon sa tinuoray nga pagserbisyo sa publiko, labi na sa mga panahon nga lisod ang kahimtang.
Source: Cebu Province PIO
I via Renante Socia Lada