Nagtipon ang nagkadaiyang ahensya sa gobyerno ug mga sektor sa dagat alang sa 1st Quarter Meeting sa Coastal Law Enforcement Alliance Region 7 aron palig-onon ang panaghiusa sa pagpatuman sa balaod sa baybayon ug kadagatan sa Central Visayas.
Gihimo ang tigum sa conference room sa Bureau of Fisheries and Aquatic Resources, kagahapon, ug gipangulohan ni RADM Agapito B. Bibat sa Philippine Coast Guard, nga chairperson sa CLEAR 7. Mitambong usab si Mayor Nestor D. Archival ug uban pang representante sa nasyonal ug lokal nga ahensya.
Sa tigum, gipresentar sa mga miyembro ang ilang mga nahimo sa unang tulo ka bulan sa tuig. Gihisgutan usab kung unsaon pagpalambo sa koordinasyon, pag-ayo sa mga pamaagi sa pagpatuman sa balaod, ug pag-align sa mga polisiya alang sa umaabot nga mga programa.
Usa sa mga importanteng hisgutan mao ang pag-update sa Memorandum of Agreement (MOA) sa CLEAR 7, pagpalig-on sa papel sa turismo ug enforcement agencies sa pagdumala sa mga kalihokan sa dagat, ug ang plano nga ipatuman ang mandatory drug testing sa mga kapitan sa tourist boats.
Gitan-aw usab ang kasamtangang pamaagi sa pag-andam sa mga sakayan sa pilot stations aron masiguro ang kaluwasan ug ka-andam sa operasyon.
Gipasiugda sa mga opisyal nga importante ang klaro nga mga lagda ug mas lig-on nga panagtinabangay sa mga ahensya aron matubag ang nagkadaiyang hagit sa coastal law enforcement. Ang mga isyu nga gipataas sa mga shipbuilders ilang tagdon ug tun-an pa aron makakita og solusyon.
Kabahin sa sunod nga lakang, planong imbitahon ang National Mapping and Resource Information Authority sa umaabot nga tigum aron makatabang sa teknikal nga giya ug papel niini sa alyansa.
Gipaabot usab nga pirmahan ang MOA sa Hulyo 21, 2026 aron mas mapalig-on ang koordinasyon ug commitment sa mga miyembro sa CLEAR 7.
Sumala sa mga opisyal, ang padayon nga panaghiusa sa mga ahensya maoy yawe aron masiguro ang kaluwasan sa mga komunidad sa baybayon, maayong pagdumala sa kadagatan, ug proteksyon sa atong kalikupan.
Source: Cebu City PIO
I via Renante Socia Lada