Tungod sa padayong hulga sa mas kusog ug mas kanunay nga mga bagyo ug uban pang katalagman, mipanawagan si Gobernor Pamela S. Baricuatro sa tanang Sugboanon nga seryosohon ang pag-andam gikan sa panimalay paingon sa barangay. Gitumbok sa gobernador nga ang kahimtang sa panahon karon nanginahanglan og kooperasyon ug kabaruganan sa matag komunidad.
Isip lakang sa pagpangandam, gipahibalo ni Gobernadora Baricuatro nga gi-reactivate na ang Provincial Disaster Risk Reduction and Management Office (PDRRMO), nga karon anaa na sa ilawom sa liderato ni Mr. Dennis Pastor. Giingon niya nga bisan pa nga anaa pa sa transition period ang administrasyon sa Kapitolyo, ilang giuna ang kahimtang sa kaluwasan sa katawhan.
Si Mr. Pastor mitutok dayon sa pakig-alayon sa mga local disaster risk reduction and management officers (LDRRMOs) sa tanang lungsod ug dakbayan. Ang tuyo niini mao ang pagsiguro nga mahatag dayon ang tanang gikinahanglan nga suporta sa mga residente kung adunay emerhensya.
Gisusi usab sa gobernador nga ang PDRRMO wala magamit og tarong sa miaging mga tuig. Apan karon, ilang gibarugan nga palig-onon pag-usab ang disaster preparedness ug response system sa tibuok Sugbo. Sa ilawom sa iyang liderato, gisaad nga walay paglangan sa mga lakang alang sa proteksyon sa katawhan.
Gilauman nga pinaagi sa maayong koordinasyon, plano, ug serbisyo, mas maprotektahan ang tanang Sugboanon batok sa umaabot nga katalagman.
Source: Cebu Province
I via Renante Socia Lada