Gitigum ni Governor Pamela Baricuatro ang Kumbati Cebu Task Force o Provincial Rehabilitation and Recovery Council (PRRC) kagahapon Biyernes, Oktubre 10, 2025, aron manguna ug magkahiusa sa pagpatuman sa mga plano sa rehabilitasyon ug pagbangon human sa linog ubos sa Kumbati Cebu framework. Ang PRRC maoy manguna sa koordinasyon ug pagtutok sa tanang kalihokan sa pagpabangon sa mga lugar nga grabe natandog sa linog.
Nagdiskuter si Gob. Baricuatro uban sa mga representante sa Office of Civil Defense, National Housing Authority, Department of Trade and Industry, kapulisan, pribadong sektor, mga mayor sa mga apektadong lugar sa norte sa Cebu, ug mga department head sa Kapitolyo. Gipresentar nila ang ilang mga aksyon ug plano alang sa mga biktima sa linog, lakip na ang mga programa sa temporaryong pagpuyo, pagtabang pinansyal, ug pagpabangon sa ekonomiya.
Gihisgutan usab sa task force ang pagsumpo ug pag-finalize sa mga cluster nga mag-atiman sa lain-laing aspeto sa pagbangon. Lakip niini ang Imprastruktura ug Puy-anan Cluster (Provincial Engineering Office/DPWH); Kahimsog, Sosyal ug Panginabuhian Cluster (PSWDO/Provincial Health Office/DTI); ug Kalikupan ug Land Use Cluster (PENRO/PPDO).
Dugang pa, adunay Ekonomiya ug Private Sector Cluster (PIPO), Komunikasyon ug Boluntaryo Cluster (PIO/PDRRMO), ug Monitoring ug Evaluation Cluster (Provincial Administrator/COA representative). Kini nga sistema motabang aron klaro ug paspas ang koordinasyon tali sa mga ahensya nga nagtinabangay sa pagbangon sa probinsya.
Matod ni Gob. Baricuatro, importante nga magkahiusa ang tanang sektor sa pagtabang sa mga apektadong komunidad. Gipasiugda usab niya nga ang “Kumbati Cebu” dili lang kampanya, kondili usa ka simbolo sa kusog ug kaisog sa mga Sugbuanon nga motindog pag-usab bisan sa kalisod.
Base sa Executive Order No. 60 nga gipagawas ni Gov. Baricuatro, ang PRRC maoy sentro sa koordinasyon ug paghimo og polisiya alang sa Kumbati Cebu framework, nga nagtinguha nga mapadali ang pagtabang, pagbangon, ug pag-ayo sa kabubut-on sa mga Sugbuanon nga naapektuhan sa linog.
Source: Cebu Province PIO
I via Renante Socia Lada