Gibungkag sa Cebu City Police Office (CCPO), uban sa inter-agency coordination, ang usa ka giilang iligal nga investment website nga nag-operate sa Barangay Kasambagan, pinaagi sa usa ka Warrant for Search, Seizure, and Examination of Computer Data (WSSECD) niadtong Martes, Mayo 27, 2025 sa alas-5 sa hapon.
Ang maong operasyon gipangulohan sa Regional Anti-Cybercrime Unit 7 (RACU7) ug gi-supervise personal ni PCOL Enrico E. Figueroa, ang Acting City Director sa CCPO.
Nitambong usab isip mga opisyal nga saksi sa operasyon si Hon. Franklyn Ong, Barangay Captain sa Kasambagan, ug mga representante sa media.
Gipagawas ang mando sa pagsusi ug pagkumpiskar sa computer data tungod sa gipasangil nga kalapasan sa Section 11 sa Republic Act 11765 (Financial Products and Services Consumer Protection Act), nga may kalambigitan sa Section 6 sa RA 10175 (Cybercrime Prevention Act of 2012).
Ang coordinated effort gilakip ang RACU7, CCPO, CIDG, DICTM, ug ang Business Permits and Licensing Office (BPLO) sa dakbayan sa Sugbo.
Matod ni PCOL Figueroa, “Our goal was to seize computers and other illicit equipment suspected of being used in fraudulent activities. These devices will serve as crucial evidence in the appropriate cases to be filed against the operators of this alleged scam hub.”
Nagpabilin ang CCPO sa ilang hugot nga baruganan batok sa mga cybercrime ug ilang paningkamot nga maprotektahan ang publiko batok sa mga ilad nga kalihokan online.
Samtang, ang dugang nga detalye ug ebidensyang makuha sa imbestigasyon ipahibalo sa publiko inig makompleto ang legal nga proseso.
Source: CCPO
I via Renante Socia Lada