Nakatala og dakong kadaugan ang Cebu Police Provincial Office (CPPO) sa ilang walay hunong nga kampanya batok sa kriminalidad, human natala ang 30% nga pagkunhod sa focus crimes gikan Enero 1 hangtod Hunyo 1, 2025, itandi sa parehas nga pabahon sa miaging tuig.
Gikompirmar kini sa CPPO nga 385 ka focus crime incidents ang nareport karong tuiga, ubos sa 549 ka kaso sa 2024. Ang maong kadungganan resulta sa mas gipakusgang presensya sa kapulisan, epektibong mga estratehiya sa pagpatuman sa balaod, ug lig-on nga panag-uban sa lokal nga mga kagamhanan ug komunidad sa tibuok probinsya.
Ang focus crimes mao ang mga krimen nga dako og epekto sa kaluwasan sa publiko sama sa murder, homicide, physical injury, rape, robbery, theft, ug pagpangawat og motorsiklo ug sakyanan. Kini ang mga krimen nga direkta nga nakaapekto sa kasiguruhan sa katawhan. Ang lapad nga pamaagi sa CPPO sama sa visibility patrols, manhunt operations, community policing, ug agresibong pagpangolekta og impormasyon maoy yawe sa pagpakunhod sa maong mga seryosong krimen.
Labing gipasigarbo ang dakong pagkunhod sa mga krimen batok sa tawo, sama sa rape ug physical injury, ug krimen batok sa kabtangan sama sa robbery ug theft. Bisan pa man sa gamay’ng pagsaka sa kaso sa murder, gipasalig sa CPPO nga gipasiugdahan na ang imbestigasyon ug padayon ang manhunt operations aron maseguro ang hustisya ug kasangkaran sa mga sala.
Si PCOL JOVITO M. ATANACIO, Acting Provincial Director sa Cebu PPO, mipasidungog sa tanang sakop sa kapulisan, force multipliers, ug mga kauban sa komunidad nga misuporta sa ilang paningkamot.
Dugang pa niya, magpadayon ang CPPO sa pagpalig-on sa ilang mga inisyatiba pinaagi sa paggamit sa moderno ug data-driven nga pamaagi sa policing.
Padayon nga nagpasalig ang Cebu Police Provincial Office sa pagpanalipod sa katawhan, pagmintinar sa kahapsay ug kalinaw, ug sa pagtukod og mas luwas nga lalawigan sa Sugbo.
Source: CPPO
I via Renante Socia Lada