Nagpadayag og dakong pahasubo ang Municipal Health Office (MHO) sa Dumanjug sa pamilya sa usa ka masuso nga taga-Barangay Doldol nga namatay niadtong Agosto 24, 2026.
Matud sa opisyal nga pamahayag sa MHO, ang bata nakadawat og Measles-Rubella (MR) vaccine niadtong Agosto 10. Apan, wala pa’y konklusyon kung adunay relasyon ang bakuna sa pagkamatay sa bata.
Gireport dayon sa MHO ang insidente ngadto sa Department of Health-Regional Epidemiology and Surveillance Unit (DOH-RESU) ug nakigtambayayong sa DOH ug Provincial Health Office alang sa hustong pag-review ug imbestigasyon sa kaso.
Sumala sa health office, gikinahanglan ang maampingong pagsusi sa medical history sa bata, clinical circumstances ug uban pang may kalabutan nga impormasyon aron matino ang tinuod nga hinungdan sa pagkamatay.
Giawhag usab ang publiko, ilabina ang mga ginikanan, nga dili maghimo og konklusyon o magpakaylap og dili beripikadong impormasyon samtang nagpadayon ang imbestigasyon. Ang MHO miingon nga ipahibalo sa publiko ang beripikadong impormasyon sa higayon nga kini mahimong available.
I via Renante Socia Lada