Gipahigayon pag-usab ang Serbisyong KUYOG Ta Free Surgery and Free Check-up diin 15 ka pasyente ang malampusong naoperahan, lakip ang siyam ka total thyroidectomy, tulo ka hernia surgeries, ug tulo pa ka laing surgical cases.
Gidumala ang mga operasyon nila Dr. Jonathan Navarro, Dr. Imeldo Gamallo, ug Dr. Kette Espinas nga mipaambit sa ilang kahibalo, panahon, ug serbisyo alang sa mga pasyente. Samtang 220 ka pasyente gikan sa nagkalain-laing bahin sa Zamboanga del Norte ang nakapa-free medical check-up sa Outpatient Department o OPD.
Gikan alas-7 sa buntag hangtod alas-9 sa gabii, padayon nga giatiman ang mga pasyente nga mitambong alang sa medical check-up. Gipahayag usab ang pagpasalamat kang Governor Darel Uy sa padayong pagpalihok sa mga programa nga nagdala sa healthcare services mas duol sa katawhan pinaagi sa Zamboanga del Norte Medical Center Medical Team.
Gipasalamatan usab ang mga doktor, nurses, medical staff, ug uban pang personnel nga mitabang sa maong medical mission, lakip si Dra. Esmeralda Nadela, Hospital Administrator. Padayon nga gipatuman pinaagi sa maong programa ang paghatag og libre nga medical ug surgical services alang sa mga residente sa probinsya.(JENIFFER JR. DELICA)
Source: Zamboanga del Norte Medical Team