Nasikop sa kapulisan ang duha ka gidudahang nalambigit sa ilegal nga drogas atol sa buy-bust operation sa Barangay Jampang, Argao, Cebu, sa hapon sa Hulyo 17, 2026.
Narekober usab sa operasyon ang gibanabana nga 60 ka gramos sa gidudahang shabu nga adunay kantidad nga ₱408,000.
Sumala sa Argao Municipal Police Station, ang operasyon gipahigayon sa Municipal Drug Enforcement Unit (MDEU) uban sa koordinasyon sa Philippine Drug Enforcement Agency (PDEA). Ang nag-unang target, nga giila isip usa ka Street-Level Individual (SLI), nadakpan human gibaligyaan og gidudahang shabu ang usa ka pulis nga nagpatoo nga buyer.
Nadakpan usab ang usa pa ka gidudahang kauban niini. Nakuha gikan sa mga suspetsado ang usa ka sachet sa gidudahang shabu nga gibaligya sa poseur-buyer, siyam pa ka sachet sa gidudahang shabu, ug ang gimarkahang ₱500 nga buy-bust money. Ang mga ebidensya gidala sa Cebu Provincial Forensic Unit aron susihon sa laboratoryo, samtang ang duha ka suspetsado gitanggong sa estasyon sa kapilisan.
Giingon ni PCOL Abubakar Udang Mangelen Jr., Provincial Director sa Cebu Police Provincial Office, nga padayon nilang pakusgon ang kampanya batok sa ilegal nga drogas aron mapugngan ang operasyon sa mga sindikato ug mapanalipdan ang komunidad. Giandam usab ang kaso batok sa duha ka suspetsado tungod sa giingong paglapas sa Sections 5 ug 11 sa Republic Act 9165 o Comprehensive Dangerous Drugs Act of 2002.
📸 CPPO
I via Renante Socia Lada