Sa usa ka dakong operasyon batok sa ilegal nga drogas ang gihimo sa Police Regional Office 7 (PRO7), nakuha ang ₱14.3 milyon nga kantidad sa ginadudahang shabu ug nasikop sa duha ka suspetsado nga drug lord sa Cebu.
Ang operasyon gihimo alas 8:39 sa gabii sa Marso 27, 2026, ang joint operatives gikan sa Police Station 9 ug City Intelligence Unit sa Cebu City Police Office, kauban ang Philippine Drug Enforcement Agency, nagpatuman og buy-bust operation sa Langub, Barangay Kalunasan, Cebu City.
Nasikop sa mga pulis silang alias “Sandra,” 54 anyos, taga Sambag 4, Barangay Guadalupe, ug alias “Budlat,” 39 anyos, taga Cabantan, Barangay Luz.
Nakuha gikan kanila ang daghang sachets ug packs sa ginadudahang shabu, buy-bust money, ug backpack nga gigamit sa pagbutang sa ilegal nga drogas.
Ang tibuok kantidad sa drogas nga nakuha moabot og 2,115 gramos, nga adunay standard drug price nga ₱14,382,000. Tanang ebidensya gihatod sa PDEA Forensic Unit 7 para sa laboratory examination. Ang mga suspetsado anaa sa Police Station 9 samtang gipreparar ang kaso batok kanila.
Gipasiugda ni PRO7 Regional Director Redrico A. Maranan nga ang operasyon nagpakita sa padayon, hiniusa, ug intelligence-driven nga paningkamot sa PRO7 aron mapukan ang ilegal nga drogas sa rehiyon. Giingon usab niya nga padayon ang lig-on ug hayag nga operasyon sa panahon sa Holy Week ug ASEAN meetings aron masiguro ang kaluwasan sa komunidad.
Source: PRO7 PIO
I via Renante Socia Lada