Dakong kalampusan ang naangkon sa imbestigasyon sa shooting incident niadtong Pebrero 19, 2026, nga biktima ang usa ka Barangay Councilor sa Luca, Balamban, human madakpan ang ginadudahang mastermind nga nailhan lang sa alyas nga “Kokong” niadtong Marso 28, 2026, sa pagpahigayon sa search warrant operation.
Ang nahitabo gisundan sa sayong pagkadakop sa gunman ug motorcycle driver nga nalambigit sa insidente. Sa ilang debriefing ug affidavit, giangkon nila ang ilang partisipasyon sa krimen ug gitudlo si alias “Kokong,” nga usab usa ka Barangay Councilor sa Barangay Luca, ingon nga mastermind nga nagplano sa pag-atake ug nagkupot sa armas nga gigamit.
Base sa nakuhang impormasyon, nangayo og search warrant ang mga imbestigador ug kini giisyu sa korte niadtong Marso 27, 2026.
Gipatuman kini sa sunod adlaw, nga nagresulta sa pagkadakop sa suspetsado ug pagkakuha sa usa ka .45 caliber pistol nga adunay upat ka bala, ug usa ka hand grenade.
Ang nadakpan nga suspetsado anaa karon sa custody sa Balamban Municipal Police Station samtang gipreparar ang kaso sa korte. Ang nakuha nga armas ipadala sa ballistic cross-matching ug forensic examination aron masuta kung kini ba ang gigamit sa krimen. Gipahibalo usab ang Explosive Ordnance Disposal (EOD) para sa husto nga pagdumala sa granade.
Gipasiugda ni PBGen. Redrico A. Maranan, Regional Director sa Police Regional Office 7, nga ang pagkadakop sa mastermind usa ka bahin sa lig-on nga kampanya batok sa gun-for-hire ug organized crime groups sa Central Visayas. Gisiguro sa otoridad nga padayon ang imbestigasyon aron mapadayon ang hustisya alang sa biktima.
Source: PRO7 PIO
I via Renante Socia Lada