Ang kasadya sa pyesta ni Señor Santiago sa lungsod sa Badian, habagatang Sugbo, naputos sa kasubo human duha ka tawo ang namatay sa disgrasya sa dalan niadtong gabii sa Hulyo 25, 2025.
Ang mga biktima giila nga sila si Cesar Castigador ug Fe Rebusa, usa ka kusinera nga iladong nanarbaho sa mga canyoneering sites sa lungsod. Naglakaw ra si Rebusa sa daplin sa dalan diha sa Sitio Curbada, Barangay Banhigan, dihang giigo sila sa usa ka red nga pick-up.
Ang drayber sa pick-up usa ka lalaki nga taga-Ginatilan, nga posible kuno hubog base sa testimonya sa mga residente. Human sa pagkaigo sa duha ka biktima, nabangga pa ang sakyanan sa poste sa kuryente nga gibitayan sa mga banderitas sa pyesta.
Gidala pa ang mga biktima sa tambalanan apan gideklarar silang dead on arrival. Samtang ang driver gidakop na ug gikatakdang kasohan sa Reckless Imprudence Resulting to Double Homicide and Damage to Properties.
Nagpadayon ang imbestigasyon sa kapulisan samtang nangayo og hustisya ang mga pamilya sa biktima, nga nasayran nga walay labot sa mga kalihokan sa pyesta kundi mga ordinaryong molupyo nga miagi lang sa lugar.
I via Renante Socia Lada