Duha ka kinabuhi ang nakalas ug usa ang naangol human gipang pusil sa paryinte tungod lang sa lubi. Didto kini nahitabo sa Barangay Candulawan, lungsod sa Minglanilla, probinsya sa Sugbo, pasado alas 4:00 sa kadlawon, Mayo 13, 2023.
Ang mga biktima giila sa Minglanilla Police Station nga mao sila Alfredo Abanon Herbias, 67 anyos ang panuigon, Marjorie Herbias Caparida, 30 anyos, puros sila residenti sa maong lugar. Samtang ang naangol mao ang laing anak nga si Florgen Herbias Bastatas, 36 anyos ang pangidaron.
Samtang ang suspetsado naila usab nga mao si Vergelio Ubas Sayago, 62 anyos, usa ka lupon sa Barangay.
Sa inbestigasyon sa Minglanilla Police Station nasayran nga samtang nangatulog ang mga biktima gisolud kini sa ilabg pinuy-anan og gipangpusil gamit ang 357 revolver.
Nahibaw-an nga naglagot pag ayo si Sayago sa iyang mga paryinte kay matud pa mao kini ang namutol ug nangibot sa mga gunanum niyang lubi sa utlanan sa ilang yuta.
Sa kalagot iyang nabuhat ang maong krimin og plano pa niini nga panghutdon sila sa pagpatay.
Hinuon nitahan ra sa kapulisan ang mamumuno human niya nabuhat ang maong krimin. Sa pagkakaron giandam na ang tukmang kaso batok sa usa ka lupon sa barangay nga niunay pagpatay sa iyang mga kaliwat. (Renante Lada, photo courtesy of Minglanilla Police Station)