Kapin ₱300 milyon nga livelihood assistance ang nahatag sa kapin 27,000 ka mga residente sa Cebu City ilawom sa Sustainable Livelihood Program (SLP) sa Department of Social Welfare and Development (DSWD) sukad pa sa tuig 2016 hangtod Hunyo 2025, base sa opisyal nga report sa ahensya.
Sa miting uban ni Mayor Nestor Archival, gipasabot ni DSWD VII Regional Director Shalaine Marie Lucero ang kalampusan sa maong programa, diin gi-highlight ang epekto niini sa mga komunidad pinaagi sa micro-enterprise development ug employment facilitation.
Sa kinatibuk-ang pondo, ₱295.6 milyon ang gigahin para sa Micro-Enterprise Development (MD), samtang P4.7 milyon ang alang sa Employment Facilitation (EF).
Ang South District sa siyudad ang adunay labing daghang benepisyaryo nga miabot sa 14,883 ka indibidwal nga nakadawat og labaw sa ₱157.7 milyon, gisundan sa North District nga adunay 12,739 ka benepisyaryo ug ₱142.6 milyon nga pondo.
Para sa tuig 2025, ang SLP nagtumong sa pagtabang sa kapin 1,600 ka indibidwal pinaagi sa seed capital funds ug Zero Hunger Program, nga adunay hapit ₱19 milyon nga pondo nga gi-allocate para sa programa.
Lakip sa mga nag-unang panginabuhian nga proyekto ang sari-sari store, pagbaligya og pagkaon, dry goods trading, rice retailing, ug uban pang small-scale reselling nga kalihokan.
Matod sa DSWD, ang mga grassroots enterprises sama niini nakahatag og ekonomikanhong oportunidad sa mga kabus nga panimalay.
Nagpadayag si Mayor Nestor Archival sa iyang tibuok-suporta sa mga programa sa DSWD, ug giila ang papel niini sa pagpalig-on sa komunidad pinaagi sa dugay nang mga programa sama sa 4Ps ug livelihood assistance.
Naglaum usab si Archival nga pinaagi sa mas lig-on nga kooperasyon tali sa DSWD ug City Government, mas daghang serbisyo ug tabang ang mahatag sa nagkalain-laing sektor sa siyudad, aron mapaayo ang kalidad sa kinabuhi sa matag usa.
Source: Cebu City PIO
I via Renante Socia Lada