Usa ka traysikol drayber ang namatay human kini mabanggaan sa usa ka pickup sports utility vehicle (SUV) nga gimaneho sa usa ka American national, pasado alas 5:00 sa buntag niadtong Nobiyembre 21, 2024, sa highway sa Barangay Tulic, Lungsod sa Argao, Sugbo.
Ang biktima giila sa Argao Police Station na mao si Dillo Abner Quiñones, 48-anyos, minyo, ug residente sa Barangay Bagot, Argao.
Naila usab ang suspetsado nga drayber sa Ford Ranger pickup na mao si Steven Taylor, 66 anyos, usa ka American national nga nagpuyo sa Barangay Malones, Lungsod sa Dalaguete, Sugbo.
Sumala sa imbestigasyon sa Argao Police Station, si Quiñones naghatod sa iyang asawa sa merkado sa Argao ug padulong na unta sa balay sa dihang nadasmagan sa SUV nga gikan pa sa Mactan airport.
Ang pickup nasangit sa traysikol dayon nabangga kini sa poste sa suga ug usa ka tindahan.
Gidala pa sa tambalanan si Quiñones apan gideklarar kini nga dead on arrival. Ang suspek nga si Taylor gidala sa Argao Police Station ug kasamtangan nga nag-atubang og kaso nga reckless imprudence resulting in homicide and damage to properties. (Renante Socia Lada)