Cebu City – Mamahimo lang ma libkas ang stoppage order nga gi issue sa Department of Labor and Employment Central Visayas (Dole 7) batok sa Universal Robina Corporation sugar pulverizing department sa Syudad sa Mandaue sa higayon nga maka comply na ang kompaniya sa mandated nga Occupational Safety and Health Standards (OSHS).
Gibutyag ni Marites Mercado, DOLE Tri-City field office chief nga nagpaabot na karon sila sa kompaniya nga mo submit sa requirements nga nagmatuud nga naka sunod na sila (URC) sa OSHS guidelines.
Gipasabot ni Mercado nga kung makapamatuud na ang kompaniya nga ila nang na hapsay ang dangers sa ilang workplace, mo rekomenda sila nga ilibkas na ang stoppage order.
Samtang, gipaklaro ni Mercado nga ang imbestigasyon nga gipahigayon sa National Bureau of Investigation ug sa Mandaue City Police Office labot sa insidente, lahi kini sa scope sa Dole.
Kahinumduman, miluwat ang Dole ug stoppage order batok sa URC Sugar Pulverizer Machine Operations human masayri sa imbestigasyon nga guba ang ilang interlock safety device sa makina.
Gitumbok nga ang depektoso nga interlock safety device giingong maoy hinungdan sa kamatayon sa usa sa ilang mga factory workers nga si Stephen Corilla.
Namatay si Coriila niadtong Hunyo 2 sa hapon, samtang nag limpyo sa pulverizing machine sa kompaniya human giingong “aksidente” kining mi-andar samtang naglimpio kini sa sulod. (Jhon Tadlip)
(News & photo courtesy of Department of Labor and Employment Central Visayas)