Ang operasyon sa Cebu South Bus Terminal (CSBT) temporaryong ibalhin sa South Road Properties (SRP) karong Sabado, Enero 17 ug Domingo, Enero 18, isip kabahin sa pag-andam sa dakong kalihokan sa Sinulog 2026.
Sumala sa anunsyo, ang maong lakang tungod sa solemn procession sa Sto. Niño de Cebu ug Sinulog street dancing, nga maghatag og dakong kausaban sa dalan ug trapiko atubangan sa CSBT sa maong duha ka adlaw.
Alang sa mga pasahero nga gikan sa habagatan padulong sa Cebu City, ipakanaog sila sa Il Corso Terminal sa SRP. Gikan didto, adunay modern jeepneys nga mosakay kanila padulong sa lain-laing bahin sa siyudad sa regular nga plete.
Samtang, ang mga pasahero nga gikan sa siyudad padulong sa habagatan gidasig nga moadto sa Katipunan Street. Gikan sa Bible Baptist area, adunay modern jeepneys nga mosakay kanila paingon sa temporaryong bus terminal sa El Pardo Road, SRP, sa gihapon sa regular nga plete.
Gipahibalo usab nga adunay 24 ka loading stations alang sa nagkalain-laing destinasyon sa temporaryong terminal sa SRP. Adunay ticketing counters, traffic enforcers, ug peace-keeping personnel, lakip na mga tent, lingkoranan, portalets, ug igo nga suga alang sa kahupayan ug kaluwasan sa mga pasahero.
Sa laing bahin, ang mga V-Hire padulong sa Simala, Moalboal, Toledo ug Pinamungajan ibutang sa bag-ong giabrihang V-Hire Terminal duol sa Taboan Market Bridge, sa tumoy sa Sanciangco Street tapad sa Barangay Hall sa Pahina Central, Cebu City. Magpadayon gihapon ang regular nga plete.
Sulod sa duha ka adlaw, ang CSBT gamiton isip parking area sa mga sakyanan sa emergency responders, kapulisan, ug mga miyembro sa Sinulog working committee. Ang regular nga operasyon sa CSBT mobalik sayo sa buntag sa Lunes, Enero 19, 2026.
Source: Cebu Province PIO
I via Renante Socia Lada