Nagpagawas og pahinumdom ang Philippine National Police (PNP) sa publiko bahin sa mga security ug safety tips aron malikayan ang krimen ug aksidente, ilabi na kung mibiya sa balay o molakaw sa gawas. Tumong niini nga masiguro ang kaluwasan sa pamilya ug kabtangan.
Sa dili pa mobiya sa balay, gidasig sa Cebu Police Provincial Office (CPPO) nga kung mahimo, maglakaw nga naay kauban. Kung magdala og bata, siguruha nga adunay nametag o contact details ang bata aron dali silang matabangan kung mawala. Importante usab nga i-lock ang tanang pultahan, bintana, ug gate sa balay.
Gipahinumduman usab ang publiko nga ayaw pagbilin og kandila nga gasiga, palonga ang gas stove, i-unplug ang tanang electrical appliances, ug siguruha nga walay delikadong butang nga mabilin sa balay. Likayi usab ang pag-post sa social media nga walay tawo sa balay aron dili makahatag og kahigayonan sa mga kawatan.
Sa dili pa mobiya sa sakyanan, gikinahanglan nga siguruhon nga naka-lock ang tanang pultahan ug bintana. Dili biyaan ang personal ug bililhong mga butang sulod sa sakyanan aron malikayan ang pagpangawat.
Gidasig usab sa PNP ang tanang motorista nga mag-park sa guwardyadong lugar kung mahimo. Padayon ang pahinumdom sa kapulisan nga ang kaluwasan magsugod sa disiplina ug pag-amping sa matag usa, aron malikayan ang krimen ug masiguro ang malinawon ug luwas nga komunidad.
Source: CPPO
I via Renante Socia Lada