Nagpagawas og pahimangno ang Cebu Police Provincial Office ngadto sa publiko bahin sa kamahinungdanon sa road safety aron malikayan ang disgrasya sa kadalanan.
Sumala sa kapulisan, importante nga sundon sa mga drayber ug motorista ang mga traffic signs ug signal.
Kinahanglan mohunong sa pula nga suga, mosunod sa speed limit, ug hatagan og pagtagad ang mga pedestrian crossing aron masiguro ang kaluwasan sa tanan nga naggamit sa dalan.
Gipasiugda usab sa Philippine National Police ang pagsul-ob og helmet sa mga nagmotor ug seatbelt sa mga drayber ug pasahero. Matud pa, dako kini’g tabang aron malikayan ang grabeng kadaot kung adunay aksidente.
Dugang pa, hugot nga gipahimangno sa kapulisan sa publiko nga likayan ang pag-inom og alkohol kung magdrayb tungod kay kini makapaluya sa hunahuna ug reaksiyon sa usa ka tawo. Dili, magmaneho nga hubog, mas maayong mangayo og tabang sa laing drayber o magpahatod na lang.
Gipahinumduman usab ang tanang motorista nga siguruhon ang maayong kondisyon sa ilang sakyanan sama sa preno, suga, ligid, ug uban pang mekanikal nga parte aron malikayan ang disgrasya sa dalan.
Sa katapusan, giawhag sa kapulisan ang publiko nga magtinabangay sa pagmintinar sa kaluwasan sa kadalanan ug dayon tawagan ang 911 kung adunay emerhensiya. Kini nga pahimangno kabahin sa kampanya sa gobyerno alang sa mas luwas nga biyahe ubos sa “Bagong Pilipinas.”
Source: CPPO
I via Renante Socia Lada