Gilusad sa Cebu Provincial Government ubos sa liderato ni Gob. Pamela Baricuatro ang “Clean Cebu Campaign” sa Marso 19, 2026 aron mapalambo ang pagdumala sa basura sa tibuok probinsya.
Sumala sa gobernador, dako na ang problema sa basura nga nakaapekto sa kahimsog sa katawhan, kalimpyo sa palibot, ug kaluwasan ilabi na kung adunay kalamidad. Busa gi-awhag niya ang tanang sektor nga magtinabangay ug mosuporta sa kampanya.
Ang maong programa usa ka paningkamot nga magkahiusa ang tanang lungsod ug siyudad sa Cebu, lakip na ang Cebu City, Mandaue City, ug Lapu-Lapu City, aron mapalig-on ang sanitation ug public health programs.
Sa kalihokan, gipahigayon usab ang “Pledge of Commitment” nga gipirmahan sa mga mayor, pribadong sektor, ug nagkadaiyang organisasyon isip pagpakita sa ilang suporta sa kampanya.
Gidayeg usab sa Department of Environment and Natural Resources Region 7 ang inisyatiba, ug misaad nga palig-onon ang pagmonitor sa mga sanitary landfill ug ipatuman ang husto nga pagsegregate sa basura sa mga komunidad.
Source: Cebu Province PIO
I via Renante Socia Lada