Cebu City – Mobalik si Cebu City Vice Mayor Michael Rama pagpangu sa organizing team nga maoy nagpaluyo sa pagpahigayon sa usa sa labing dakong festival sa nasod, ang Sinulog.
Gawas sa tinguha pagpakigtagbo sa ubang opisyal sa SFI o Sinulog Foundation Inc. ug sa mga stakeholders labot sa Sinulog 2021, buot ni Rama nga wagtangon ang Sinulog Governing Board.
Nahinabi sa media, si Rama miingon nga kon naa may Sinulog mas maayong usa ra ka organizing body ang molihok ug motan-aw sa pagpangandam.
Si Rama ang chairman of SFI.
Una niini, gipadayag Mayor Edgardo Labella nga mahnayon ang Sinulog 2021 kon mahibalik sa normal ang sitwasyon sa siyudad.
Matod ni Labella, iyang tahasan si Rama ug ubang sakop sa SFI pagpangu sa event nga nadungan sa ika-500 nga anibersaryo sa Kristiyanismo.
Apan si Rama midugang nga iyang pangayoon ang consensus sa ubang membro ug stakeholders aron makakab-ot silag kongretong plano unsaon pagpahigayon ang festival ubos sa post-pandemic. (Jhon Tadlip/JTY)
(Source: Cebu City Public Information Office)