Nasikop ang usa ka Chinese national sa usa ka entrapment operation nga gihimo sa Mandaue City Police Office uban sa City Intelligence Unit niadtong Abril 19, 2025, tungod sa kaso nga robbery-extortion.
Ang operasyon gilusad human ang usa ka 55-anyos nga Chinese national mitug-an sa kapulisan nga gipangayuan siya og PhP 20,000.00 sa suspek bugti sa pagtabang kuno sa pag-areglo sa usa ka giingong pending warrant of arrest.
Nahitabo ang operasyon sa usa ka tea house sa Mantawi Drive, Barangay Tipolo, Mandaue City. Nasikop ang 37-anyos nga suspek sa dihang gidawat niya ang kwarta nga giandam isip bayad atol sa maong transaksyon.
Ang Police Station 2 sa Mandaue City Police Office, uban sa City Intelligence Unit, mao ang nagdumala sa operasyon nga nahitabo pasado alas 6:20 sa gabii.
Matod ni Police Brigadier General Redrico Maranan, Regional Director sa Police Regional Office 7 (PRO7), ang kalampusan sa operasyon nagpamatuod sa ilang hugot nga paningkamot sa pagtuman sa balaod ug pagpanalipod sa katawhan.
Gidayeg usab niya ang paspas ug propesyonal nga aksyon sa mga sakop sa Police Station 2.
Ang suspek kasamtangang gibilanggo sa Police Station 2 samtang nagpadayon ang dokumentasyon ug pagproseso sa pormal nga pagsaka og kaso.
Source: PRO7- PIO
I via Renante Socia Lada
#rpndykccebu
#675hzamband
#mrpublicservice