Misuroy si PGEN Rommel Francisco D. Marbil, hepe sa Philippine National Police, sa Police Regional Office 7 (PRO7) kagahapong adlawa, Mayo 9, 2025. Ang iyang pagbisita nagtumong sa pagpahigayon og Command Conference aron susihon ug palig-onon ang kahimtang sa seguridad para sa umaabot nga 2025 midterm elections.
Niadto siya sa Camp Lapu-Lapu, Barangay Lahug, Cebu City, sakay sa PNP Airbus H125 ug gi abi-abi sa mga opisyal sa PRO7. Kini mao’y iyang unang opisyal nga panagtagbo sa PRO7 sukad siya nahimong Chief PNP.
Gipresentar ni PRO7 Regional Director PBGEN Redrico A. Maranan ang mga kalampusan sa buhatan gikan Enero hangtod Abril 30, 2025, lakip na ang pagpakunhod sa krimen, operasyon sa kapulisan, ug mga programa sa komunidad.
Gihatagan usab og pasidungog ang duha ka pulis nga nasamdan sa ilang serbisyo. Si PSMS Allain Abellanosa sa SWAT, Cebu City Police Office, nadawat og Medalya ng Sugatang Magiting human masamdan sa pagresponde sa usa ka armado nga tawo sa Brgy. Pahina, Cebu City niadtong Marso 27. Samtang si Patrolman Renzil Flaviano Carillo sa Police Station 2 nasamdan sa pagresponde sa pagpangawat sa Palladium Suites Hotel niadtong Abril 8.
Gipadayag usab ni PCOL Reynaldo Maclang sa Fiscal Division ang mga reporma sa budget ubos ni PGEN Marbil,
lakip na ang pagdugang sa Replacement Clothing Allowance, pagpaayo sa pondo para sa 2026 (MOOE), ug ang paghatag sa Service Recognition Incentive (SRI).
Nagpakigstorya usab si PGEN Marbil sa mga personahe sa PRO7 aron siguruhon nga andam ug propesyonal ang kapulisan sa panahon sa piliay.
Ang PRO7 mag-uban sa COMELEC, AFP, ug uban pang ahensya sa pagpangandam para sa hapsay, tinud-anay, ug malinawon nga eleksyon karong 2025.
Source: PRO7- PIO
I via Renante Socia Lada