Gisaulogan sa Kapitolyo sa Sugbo ubos sa liderato ni Gobernor Pamela Baricuatro ang usa ka residente sa Toledo City nga nakaabot sa edad nga 100 tuig.
Si Emigdio S. Hernan sa Barangay Cantabaco, Toledo City, malipayong midawat sa ₱100,000 nga tseke isip insentibo gikan sa probinsya niadtong Setyembre 3, 2025.
Si lolo Emigdio usa ka mag-uuma, iyang gisulti nga ang sekreto sa taas nga kinabuhi mao ang kanunay nga pagkaon og utan ug isda, ug ang pagkinabuhi uban sa pag-ampo ug pagpasalamat matag-adlaw.
Si Lolo Emigdio natawo niadtong Mayo 20, 1925. Siya adunay tulo ka anak—usa ka laki ug duha ka babaye—ug gisaulog usab sa iyang pamilya nga adunay na siya’y 20 ka mga apo.
Ang pag-turnover sa insentibo gipangulohan nila Provincial Board Members Julius Corominas ug Lorenz Lagon, uban ang Toledo City Social Welfare and Development Office, Provincial Social Welfare and Development Office, ug mga opisyal sa Barangay Cantabaco.
Kini nga programa sa Kapitolyo naghinaot nga mahatagan og pasidungog ug suporta ang mga centenarians nga sama ni Lolo Emigdio, nga nagbilin og inspirasyon ug panag-ingnan sa kalig-on ug pagkamatinabangon.
Source: Cebu Province PIO
I via Renante Socia Lada