Si People’s Governor Pamela Baricuatro gitudlo isip Vice President for Ways and Means sa League of Provinces of the Philippines (LPP) atol sa Special General Assembly nga gipahigayon sa Edsa Shangri-La niadtong Septiyembre 2, 2025.
Nagkatigum ang mga gobernador sa tibuok nasud aron hisgutan unsaon paglig-on ug pag-institutionalize sa papel sa mga probinsya sa pagpili ug pagpatuman sa mga proyekto sa nasyonal nga gobyerno. Kini may kalabotan usab sa panawagan ni Presidente Ferdinand Marcos Jr. alang sa accountability, transparency, ug fairness sa pagdumala sa imprastruktura.
Karong adlawa, Septiyembre 3, personal nga gipapanumpa ni Presidente Marcos sa katungdanan ang mga bag-ong napiling opisyales sa LPP sa Kalayaan Hall sa Malacañang Palace.
Kini nga pagtudlo nagpasabot sa mas dako nga papel sa Cebu ug uban pang mga probinsya sa pagtinabangay sa gobyerno nasyonal alang sa mas episyente nga serbisyo sa katawhan.
Nagpasalamat ug nagpasidungog usab ang Kapitolyo ngadto kang Gob. Baricuatro ug sa tanan nga bag-ong opisyales sa LPP tungod sa ilang bag-ong responsibilidad nga mag-alagad sa katawhan pinaagi sa lig-on nga liderato.
Source: Cebu Province PIO
I via Renante Socia Lada