Gi-aprobahan na sa Cebu Provincial School Board (CPSB), nga gipangulohan ni Governor Pamela Baricuatro, ang pagpamalit og mga school supplies para sa mga estudyante sa ilawom sa Department of Education (DepEd) Cebu Province alang sa tuig 2026. Tumong niini nga matabangan ang mga tinun-an sa ilang kinahanglanon sa eskwela ug masiguro nga andam sila sa mosunod nga tuig para eskwela.
Apan, wala pa mahuman ang eksaktong kantidad sa budget kay naghulat pa ang CPSB sa final list sa gidaghanon sa mga enrollees gikan sa DepEd Cebu Provincial Division. Sumala ni Schools Division Superintendent Dr. Senen Priscillo P. Paulin, adunay 886,711 ka enrollees karong tuiga ug kasagaran mosaka og 10 porsiyento ang ihap matag mosunod nga tuig.
Lakip sa mga ipamalit sa board mao ang school bags, pad paper, notebooks, ballpen, lapis, crayons, rulers, ug apil na usab ang mga sandals para sa ubang estudyante. Kon igo pa ang pondo, posible usab nga iapil ang paghatag og tumblers ug document bags para sa mga magtutudlo.
Gipasabot sa CPSB nga ang procurement usa ka paagi aron matabangan ang mga estudyante ilabi na kadtong gikan sa mga lugar nga limitado ang materyales sa pag-eskwela. Dakong tabang kini aron mapalambo ang kalidad sa edukasyon ug mapagaan ang gasto sa mga ginikanan.
Samtang, gipahibalo sa Provincial Treasurer nga si Atty. Roy Salubre nga adunay kapin ₱1.143 bilyon nga balance ang pondo sa school board base sa ilang rekord niadtong Nobyembre 27, 2025. Naghatag kini og kasiguroan nga adunay igo nga pondo alang sa plano nga procurement ug uban pang programa sa edukasyon sa lalawigan.
Source: Cebu Province PIO
I via Renante Socia Lada