Padayon ang kahimtang sa Alert Level Red sa Probinsya sa Sugbo human sa magnitude 6.9 nga linog nga miigo sa Bogo City sa alas-9:59 sa gabii niadtong Setyembre 30, 2025. Ang Incident Command Post (ICP) sa Bogo City nagpabiling sentro sa operasyon ug koordinasyon sa tanang relief ug rescue efforts sa probinsya.
Ang pinaka apektado nga mga lugar mao ang Bogo City, Medellin, San Remigio, Daanbantayan, Sogod, ug Borbon, samtang adunay usab mga kadaut nga natala sa Tabogon, Tabuelan, Tuburan, Bantayan, Sta. Fe, Catmon, Carmen, San Francisco, ug Madridejos. Natala ang 209,972 ka pamilya o 372,513 ka indibidwal nga naapektuhan, ug 26,140 ka pamilya ang napugos molikay sa ilang mga panimalay. Anaa usab ang 71 nga kumpirmadong patay, 3 ang missing, ug 592 ang samaran.
Daghang mga kalsada, tulay, ug mga building ang nadaot, lakip na ang Bogo City Hall, Daanbantayan Municipal Building, mga simbahan ug eskwelahan. Adunay usab mga sinkhole ug buak sa yuta nga nakit-an sa Medellin, Borbon, ug San Remigio. Sa pagkakaron, 99% sa kuryente ug signal sa komunikasyon anaa na, apan ang operasyon sa mga pantalan sa Hagnaya, Pulangbato, ug Bantayan gipahunong pa samtang gisusi ang kaluwasan.
Sumala sa ulahing report, ang Kapitolyo nakadawat na og ₱66.4 milyon nga cash donations ug ₱7.9 milyon nga in-kind donations. Padayon ang pag-apod-apod sa mga relief goods sa Bogo, San Remigio, Medellin, Daanbantayan, Sogod, Tabogon, ug Borbon. Gihangyo sa Gobernador nga dili na magpadulong sa amihanang Sugbo ang mga pribadong donors, ug imbis ipaagi ang ilang tabang sa Donation Hub sa Danao City Boardwalk, nga gimugna sa pakigtambayayong sa Cebu Provincial Government ug LGU Danao.
Padayon ang operasyon sa Philippine Air Force sa paghatod sa relief packs sa mga isla sama sa Carnaza sa Daanbantayan, samtang ang Provincial Health Office nagpadala og medikal, WASH, ug nutrition assistance. Ang Emergency Operations Center sa Kapitolyo nagpadayon sa 24-oras nga pagbantay ug koordinasyon.
Source: Cebu Provincial PIO
I via Renante Socia Lada
#rpndykccebu
#675hzamband
#tandemexpress