Gipadayag ni Cebu Governor Gwendolyn Garcia ang iyang pagsupak sa bag-ong pagsuway sa pagpahawa kaniya sa pwesto atol sa usa ka press conference nga gipahigayon sa Cebu Provincial Capitol niadtong Miyerkules, Mayo 21, 2025, kauban ang iyang legal team.
Ang reklamo nga gisang-at ni Michelle R. Osmeña may kalabutan sa Bus Rapid Transit (BRT) project nga nag-agi sa Osmeña Boulevard, atubangan mismo sa Kapitolyo sa Sugbo.
Matod ni Gob. Garcia, kini nga reklamo susama ra sa unang reklamo ni kanhi Cebu City Mayor Michael Rama, kinsa niadtong Marso 2024 misang-at og kaso batok kaniya tungod sa iyang pagpagawas og cease-and-desist order aron ipahunong ang konstruksyon sa yuta nga gipanag-iya sa probinsya nga naapil sa BRT project.
Apan niadtong Oktubre 2024, gisalikway sa Office of the President ang reklamo ni Rama tungod sa kakuwang sa ebidensya nga magpalig-on sa mga akusasyon sa abuso sa awtoridad ug kalapasan sa serbisyo publiko.
Gibutyag pa ni Gob. Garcia nga ang iyang legal team nakadiskobre og mga dokumento nga kadudahan ug posibleng peke nga may kalambigitan sa bag-ong nagreklamo nga si Osmeña.
Ang BRT project usa ka mayor nga inprastruktura nga gitinguhang mapaayo ang pampublikong transportasyon sa Dakbayan sa Sugbo, apan nahimong kontrobersyal tungod sa kabalaka nga makaapekto kini sa mga lugar nga adunay kasaysayan ug kabilin.
Giklaro sa gobernador nga ang iyang aksyon sa pagpahunong sa maong proyekto gibase sa tambag ni Dr. Jose Eleazar Bersales, sakop sa NCAA National Advisory Board, nga mitumbok sa posible nga paglapas sa balaod sa kabilin (heritage laws).
Source: Cebu Provincial Capitol, PIO
I via Renante Socia Lada