Duha ka kinabuhi ang nakalas sa usa ka aksidente sa kadalanan sa Barangay Tangnan, lungsod sa Panglao, Bohol sa mabugnaw nga kadlawon sa Mayo 19, 2025.
Ang mga biktima giila nga sila si Daniel Estoquia, 58 anyos, ug si Ramon Cimafranca VIII, 30 anyos, parihong mga residente sa maong lungsod. Si Estoquia mao ang nagmaneho sa motorsiklo, samtang si Cimafranca nagmaneho sa Toyota Vios.
Sumala sa imbestigasyon ni PCMS Michael Armeldez sa Panglao Police Station, nagbiyahe ang duha ka sakyanan sa pariho nga direksyon. Apan pag-abot sa dapit sa Purok-4 sa Barangay Tangnan, kalit nga nadumbolan ang motorsiklo, hinungdan sa pagkaangol ni Estoquia. Ang sakyanan ni Cimafranca midiretso usab ug nabangga sa usa ka punoan sa lubi, nga hinungdan usab sa iyang grabeng kadaot.
Gidali pa ang pagdala sa duha ka biktima sa tambalanan, apan sila gideklarar nga dead on arrival sa pag-abot sa ospital.
Padayon ang imbestigasyon sa kapulisan aron matino ang hinungdan sa aksidente ug kung adunay posibilidad nga nagpadagan og kusog ang usa sa mga sakyanan.
I via Renante Socia Lada