Ang Cebu City Police Office (CCPO) ubos sa liderato ni Police Colonel Antoniello Ybañez Cañete, City Director, nagpasiugda og kolaborasyon uban sa mga hotel ug accommodation industry aron masiguro ang kaluwasan sa komunidad pinaagi sa aktibong community policing strategies.
Niadtong Enero 9, 2025, sa hapon, gipahigayon ang usa ka tigom sa Radisson Blu Hotel nga gitambongan sa kapin usa ka gatos ka hotel managers ug security officers.
Ang tigom kabahin sa Capacitating Community Stakeholders Initiative, nga nagtinguha nga palig-onon ang partisipasyon sa industriya sa accommodation sa Cebu City aron makigbatok sa mga krimen sama sa: Pagpanakop sa drogas, Pagpangawat, mga hulga sa bomba, Mga active shooter scenarios, Human trafficking, labi na sulod sa hotel facilities.
Sumala ni PCOL Cañete, ang kalihokan nagpunting sa pagpahibalo ug pag-andam sa mga stakeholder aron mahimong mas alerto ug andam nga makasugakod sa mga hulga sa seguridad.
Ang kolaborasyon tali sa kapulisan ug mga hotel mahimong instrumento aron mahatagan ug siguridad sa komunidad. Kini usa ka kolektibong paningkamot aron masiguro ang kalinaw ug kahapsay sa Dakbayan sa Sugbo.
Ang CCPO nagpasalig nga magpabiling aktibo ug mapatigbabaw ang kaluwasan sa siyudad pinaagi sa lig-on nga pakigtambayayong tali sa publiko ug pribadong sektor. (Renante Socia Lada)