Ning nagkaduol na National ug Local Elections karong Mayo 2025, gipakusgan sa Cebu City Police Office (CCPO) ang ilang preparasyon pinaagi sa pagdumala og mga simulation exercises alang sa seguridad.
Gipahigayon sa CCPO ang mga ensayo nga naglangkob og mga sitwasyon sama sa bomb threat, hostage-taking, kagubot, ug protesta. Ang tuyo niini mao ang pagsusi sa ka-andam sa mga kapulisan ilawom sa pagdumala ni Police Brigadier General Redrico A. Maranan, Regional Director sa Police Regional Office 7.
Kagahapong adlawa, Abril 26, gipahigayon ang usa ka hostage-taking simulation sa Cebu City Hall, nga usa sa mga lead canvassing areas sa eleksyon. Gisabayan pa kini og civil unrest ug bomb threat scenario aron matestingan gyud pag-ayo ang kahimtang sa mga kapulisan.
Gisusi ug personal nga gi-assess ni PBGEN Maranan ang performance sa CCPO atol sa maong simulation. Iyang gibutyag nga padayon ang ilang paningkamot aron masiguro ang kaluwasan sa publiko karong eleksyon.
Nagkahiusa usab ang mga ahensya sa gobyerno ug mga partner organizations sa Cebu City aron mapa-lig-on ang kaluwasan ug seguridad sa umaabot nga eleksyon.
Si Police Colonel Enrico E. Figueroa, Acting City Director sa CCPO, miingon nga ang kapulisan andam ug seryoso sa ilang misyon nga mapadayon ang kalinaw ug kahapsay sa dakbayan.
Ang mga kalihokan sa CCPO nagsunod sa mga programa ni PBGEN Maranan nga nag-awhag sa partisipasyon sa komunidad sa mga kalihokang pangkaluwasan.
Pinaagi sa pagdugang sa presensya sa kapulisan ug pagpalig-on sa pagpatrol, gitinguha sa CCPO nga mas mapalig-on pa ang kaluwasan sa tanang residente ug botante karong umaabot nga eleksyon.
Source: CCPO
I via Renante Socia Lada