Naluwas ang Cebu City Police Office (CCPO) ang usa ka bag-ong natawo nga bata nga gilabay sa sayong buntag sa Gotianoy Street, Barangay Kamputhaw, Cebu City, niadtong Enero 20, 2026.
Sumala sa report, nakadawat og tawag ang CCPO gikan sa mga residente nga nakakita sa bata. Dali mitubag ang mga pulis nga anaa sa Elevated Outpost 005, Cebu City Mobile Force Company, ug nakasecure sa lugar aron masiguro ang kahimtang sa bata.
Gidala dayon ang bag-ong natawo sa Vicente Sotto Memorial Medical Center (VSMMC) para sa medical care ug proteksyon. Ang Women and Children Protection Desk (WCPD) sa CCPO mao’y nagdumala sa imbestigasyon aron masuta ang rason sa pagbiya sa bata ug kung kinsa ang responsable. Sa inisyal nga imbestigasyon, naila ang usa ka person of interest, nga gituohan nga inahan sa bata. Kasamtangang naa sa ospital ang puya nga batang babaye samtang gihatagan og medikal nga pag-atiman ug giimbestigahan sa hustong proseso.
Base sa report, ang babaye nagpuyo temporarily sa usa ka apartment sa Kamputhaw human moanhi sa Cebu City para sa Sinulog Festival. Sa sayong buntag, nabantayan sa mga silingan nga nagdugo siya ug gidala dayon sa VSMMC. Sa wala pa siya dad-on sa ospital, nakita nga nagbiya siya og usa ka bag sa garbage area; didto nakit-an ang bata.
Ang inahan ug ang batang babaye karon pareho nagpadayon og pag-atiman sa ospital. Giingon ni PCOL George V. Ylanan, Officer-in-Charge sa CCPO, nga seryoso kaayo ang kapulisan sa kaso ug sigurado nga mapatubag ang responsable sa balaod.
Source: CCPO
I via Renante Socia Lada