Gisugdan ang Crime Prevention Week sa Cebu City uban sa dakong kalampusan sa operasyon sa Cebu City Police Office (CCPO). Sukad Agosto 25 hangtod Septyembre 1, 2025, gipahigayon ang sunod-sunod nga operasyon sa tanang 80 barangay sa syudad pinaagi sa Oplan Bulabog ug Oplan Bakal-Sita uban sa tabang sa lokal nga kagamhanan ug mga force multipliers.
Pinangulohan ni CCPO Acting City Director PCOL Enrico Evangelista Figueroa uban ni PRO7 Regional Director PBGEN Redrico A. Maranan, nakadakop ang kapulisan og 13 ka tawo nga nalambigit sa iligal drogas. Kapin 4.24 gramos nga gituohang shabu nga nagkantidad og ₱28,832 ang nasakmit, samtang upat pa ka suspek ang nadakpan tungod sa iligal possession of firearms.
Gipalapdan usab ang operasyon pinaagi sa inspeksyon sa 1,867 ka establisemento nga misangpot sa pagsalbar sa 412 ka menor de edad nga nakalapas sa curfew. Naghimo usab ang kapulisan og 35 citation tickets alang sa mga nakalapas sa lokal nga ordinansa sama sa smoking ug public urination.
Matod ni PBGEN Maranan, ang makita nga presensya sa kapulisan labi na sa mga lugar nga prone sa krimen importante aron malikayan ang kadaot. Giila usab niya ang kooperasyon sa mga partner agencies ug stakeholders nga adunay dakong papel sa kalampusan sa mga lakang batok krimen.
Source: CCPO
I via Renante Socia Lada