Gikumpiskar sa Police Regional Office (PRO) 7 ang 157 ka iligal nga armas ug 385 ka bala sa nagkalain-laing operasyon sa tibuok buwan sa Agosto.
Sa maong ihap, 116 ka armas ang nakuha pinaagi sa police responses, 21 pinaagi sa search warrants, 18 atol sa buy-bust operations ug 2 dihang nagserbisyo og warrant of arrest ang kapulisan. Nakuha usab ang unom ka eksplosibo.
Sa Oplan Katok, unom ka armas ang boluntaryong gisurender, samtang pito pa ka dili rehistrado nga armas ang gidala sa mga tawo ngadto sa police station.
Kinatibuk-ang 92 ka tawo ang nadakpan ug gikasohan ilawom sa balaod nga nagdili sa pagpanag-iya ug paggamit sa iligal nga armas. Matod ni PBGEN Redrico A. Maranan, Regional Director sa PRO7, magpadayon ang kapulisan sa pagpangdakop aron masiguro ang kalinaw ug seguridad sa komunidad.
Source: PRO7-PIO
I via Renante Socia Lada