Nagpagawas og lig-on nga pahimangno ang Cebu City Police Office (CCPO) batok sa paghimo ug pagpakatap og bomb joke o peke nga bomb threat. Giingon sa kapolisan nga ang maong binuhatan dili kataw-anan kondili usa ka seryosong paglapas sa balaod.
Sumala sa CCPO, ang paghimo o pagpakaylap og bakak nga bomb threat pinaagi sa personal nga estorya, tawag sa telepono, text, email, social media, o uban pang paagi sa komunikasyon mahimong makahatag og dakong kahadlok sa publiko ug makabalda sa normal nga kalihokan sa komunidad.
Gipasabot usab sa kapolisan nga ubos sa Presidential Decree No. 1727 o Anti-Bomb Joke Law, ang mapamatud-ang nakahimo og bomb joke mahimong mapriso hangtod sa lima ka tuig, multa og hangtod ₱40,000, o pareho nga silot depende sa desisyon sa korte.
Dugang pa sa CCPO, ang bomb joke makapugos sa mga awtoridad sa pagresponde sa peke nga alarma, nga maoy hinungdan sa pag-usik sa oras, pondo ug kusog sa mga pulis, bomb disposal team, ug rescue responders nga unta gitumong sa tinuod nga emerhensya.
Giawhag sa CCPO ang publiko nga maghunahuna una pa mosulti o mag-post sa social media, sigurohon nga tinuod ang impormasyon, ug dayong ireport sa mga awtoridad ang bisan unsang kasaligan nga bomb threat. Gipasiugda sa kapolisan nga padayon silang mopasaka og kaso batok sa mga molapas sa balaod aron mapadayon ang kalinaw ug kaluwasan sa Sugbo.
CCPO
I via Renante Socia Lada
