Mipasiugda ang Cebu City Police Office (CCPO) sa pagpalig-on sa kaandam sa komunidad pinaagi sa pag-apil sa Oplan Pakigsandurot Capacity Building nga gihimo kagahapon, sa Cebu City Sports Institute. Gipangulohan kini ni Acting City Director PCOL Ricky C. Sumalde, uban sa pagtambong ni Cebu City Mayor Nestor Archival, mga miyembro sa City Council, ug uban pang mga kauban sa programa.
Gitambongan ang kalihokan sa mga boluntaryo, force multipliers, ug mga partner sa komunidad. Gitudloan sila sa husto nga pamaagi sa pag-andam sa panahon sa kalamidad, emergency response, Basic Life Support (BLS), ug sakto nga paggamit sa handcuff ug pagdumala sa usa ka suspetsado.
Matod ni PCOL Sumalde, importante ang panagtinabangay sa kapulisan, lokal nga panggamhanan, ug komunidad aron mapadayon ang kalinaw, kaluwasan, ug kaandam sa syudad batok sa bisan unsang emerhensya. Miingon usab siya nga ang maong programa makatabang sa pagpalambo sa kahibalo ug kahanas sa mga boluntaryo ug force multipliers.
Gipasalig sa CCPO nga magpadayon kini sa pagpalig-on sa pakigtambayayong sa komunidad pinaagi sa mga programa nga naghatag og kahibalo ug pagbansay aron mas andam ang mga lumulupyo sa pag-atubang sa mga kalamidad ug uban pang emerhensya.
📸 CCPO
I via Renante Socia Lada