Nagpagawas og pahimangno ang Cebu City Police Office alang sa publiko kabahin sa seguridad ug kaluwasan karong Holy Week, ilabi na sa daghang mobiyahe ug mobisita sa simbahan ug mga suruyanan.
Gipahinumduman sa kapulisan nga siguro-on ang balay sa dili pa molakaw, sama sa pagsira sa tanang pultahan ug bintana, pag-unplug sa mga appliances, ug pagpahibalo sa kasaligan nga silingan. Gidasig usab ang publiko nga likayan ang pag-post og real-time updates sa ilang biyahe aron malikayan ang kawat.
Sa mga mobiyahe, gitambagan nga siguro-on ang kondisyon sa sakyanan, likayan ang pag-drive kung hubog o kapoy, ug sundon ang balaod sa dalan sama sa pagsul-ob og seatbelt o helmet.
Gipahimangnoan usab ang mga tawo nga magmatngon sa mga dagkong panagtapok sama sa mga prosisyon ug simbahan, ilabi na batok sa mga pickpocket ug snatcher. Mas maayo nga dili magsul-ob og mahalon nga alahas.
Alang sa mga moadto sa baybayon, importante nga sundon ang mga pahimangno sa lifeguard, bantayan kanunay ang mga bata. Gidili usab ang paglangoy human sa pag-inom og makahubog nga ilimnon.
Sa bahin sa kalayo, gitambagan ang publiko nga dili pasagdan ang kandila nga nagdagkot ug siguroon nga napalong ang tanang appliances aron malikayan ang sunog.
Gipasiugda usab ang pag-atiman sa panglawas pinaagi sa pag-inom og daghang tubig, paglikay sa heatstroke, ug pagdala og first aid kit ilabi na sa init nga panahon.
Sumala sa kapulisan, ang Semana Santa usa ka panahon sa pag-ampo ug pagpamalandong, ug ang kaluwasan sa matag usa makatabang aron mahimong malinawon ug makahuluganon ang selebrasyon. Gi-awhag usab ang publiko nga magpabiling alerto ug responsableng molihok, ug tawagan dayon ang 911 kung adunay emerhensiya.
Source: CCPO
I via Renante Socia Lada