Gipasabot sa Cebu City Police Office (CCPO) ubos sa pagpangulo ni City Director PCOL George V. Ylanan nga dili tinuod ang naglibot nga report ug video sa social media bahin sa kunohay nahitabong tulis sa 17th Street, Barangay Nazareth ug Tomas Saco 1st Street nga giingong nahimutang sa Barangay Buhisan, Cebu City.
Matud sa CCPO, human sa ilang dali nga beripikasyon ug imbestigasyon, napamatud-an nga walay ingon nga mga dalan sa Barangay Buhisan ug bisan sa mga kasikbit nga barangay. Gisiguro usab sa mga opisyal sa barangay nga wala sila makaila sa maong mga lugar nga gihisgutan sa report.
Dugang pa, walay natalang insidente sa tulis nga mitakdo sa gipanghisgutan sa social media sa oras nga alas-2:58 sa kadlawon niadtong Abril 23, 2026. Wala usab kini na-report sa kapulisan o sa barangay nga may sakop sa maong lugar.
Sa dugang nga pag-validate, lakip na ang pagsusi sa video ug mga komento online, nasuta nga posible nga ang insidente nahitabo sa Cagayan de Oro City, diin tinuod nga adunay 17th Street sa Barangay Nazareth ug Tomas Saco 1st Street.
Tungod niini, gipadayag sa CCPO nga sayop ang giingong lokasyon sa maong insidente ug wala kini nahitabo sa Barangay Buhisan, Cebu City. Giawhag usab sa kapulisan ang publiko nga magmatngon ug responsable sa pagbahin sa impormasyon sa social media, ug siguruhon nga kini gikan sa opisyal ug kasaligan nga tinubdan aron malikayan ang pagkatag sa sayop nga balita.
Nagpadayon ang CCPO sa ilang paningkamot sa paghatag og tukmang impormasyon, pagmintinar sa pagsalig sa publiko, ug pagseguro sa kaluwasan sa komunidad pinaagi sa paspas ug epektibong serbisyo.
Source: CCPO
I via Renante Socia Lada